Sindikata e Punëtorëve të Telekomit të Kosovës ka paralajmëruar për sot një protestë nga ora 13:00 para objektit të Qeverisë së Kosovës, për shkak të gjendjes së krijuar në Telekomin e Kosovës.
Punëtorët e Telekomit ende nuk i kanë marrë pagat e muajit tetor, ndërsa thonë se tashmë po rrezikohet seriozisht edhe funksionimi i ndërmarrjes.
Punëtorët e Telekomit kanë paralajmëruar edhe më herët protesta e greva nëse Qeveria e Kosovës nuk ndërmerr asnjë hap për të zhbllokuar llogaritë dhe kthimin e mjeteve në llogarinë e Telekomit, të cilat janë bllokuar e tërhequr nga kompania “Dardafon”, kompania amë e Z-Mobile, si pasojë e borxhit ndaj saj.
